നിയന്ത്രണം വിട്ട ചെങ്കൽലോറി ഡിവൈഡർ തകർത്ത്, എതിരെ വരികയായിരുന്ന ഗ്യാസ് ടാങ്കറിലിടിച്ചു

കണ്ണൂർ:
മേലെ ചൊവ്വയിൽ നിയന്ത്രണം വിട്ട ചെങ്കൽലോറി ഡിവൈഡർ തകർത്ത്, എതിരെ വരികയായിരുന്ന ഗ്യാസ് ടാങ്കറിലിടിച്ചു. തലനാരിഴയ്ക്കാണ് വൻ അപകടം ഒഴിവായത്.

വ്യാഴാഴ്ച രാത്രി പത്തരയോടെയാണ് സംഭവം. വടകരയിൽ ചെങ്കല്ലിറക്കി തിരിച്ച് കണ്ണൂർ ഭാഗത്തേക്ക് വരികയായിരുന്ന ലോറിയാണ് കോഴിക്കോട് ഭാഗത്തേക്ക് ഗ്യാസ് കയറ്റി പോവുകയായിരുന്ന ടാങ്കറിലിടിച്ചത്.

രണ്ട് വാഹനങ്ങളിലുമുണ്ടായിരുന്നവർ നിസ്സാര പരിക്കുകളോടെ രക്ഷപ്പെട്ടു. അപകടത്തെത്തുടർന്ന് ദേശീയപാതയിൽ ഗതാഗതം സ്തംഭിച്ചു. ടൗൺ പോലീസ് സ്ഥലത്തെത്തിയാണ് ഗതാഗതം നിയന്ത്രിച്ചത്.

ക്രെയിനുപയോഗിച്ച് വാഹനങ്ങൾ നീക്കി. പോലീസും നാട്ടുകാരും ചേർന്ന് റോഡിലെ ചില്ല് നീക്കംചെയ്ത് വാഹനഗതാഗതം സുഗമമാക്കി.