കീഴാറ്റൂര്‍ ബൈപ്പാസ്; കുടുംബങ്ങളെ ഒഴിപ്പിക്കുന്നതിനു ഹൈക്കോടതിയുടെ സ്‌റ്റേ; പോരാട്ട വിജയമെന്ന് സുരേഷ് കീഴാറ്റൂർ

കീഴാറ്റൂര്‍ ബൈപ്പാസ് നിര്‍മ്മാണത്തിന്റെ ഭാഗമായി കുടുംബങ്ങളെ ഒഴിപ്പിക്കുന്നത് ഹൈക്കോടതി താല്‍ക്കാലികമായി സ്‌റ്റേ ചെയ്തു. കീഴാറ്റൂര്‍ വിഷയത്തില്‍ സമരം ചെയ്യുന്ന വയല്‍ക്കിളികള്‍ സമര്‍പ്പിച്ച ഹര്‍ജിയിലാണ് ഹൈക്കോടതി ഉത്തരവ്.എന്നാല്‍ സ്ഥലം ഏറ്റെടുക്കല്‍ ഉള്‍പ്പടെയുള്ള പ്രവര്‍ത്തനങ്ങളുമായി സര്‍ക്കാരിന് മുന്നോട്ട് പോകാമെന്നും ഹൈക്കോടതി വ്യക്തമാക്കുന്നു

വയല്‍ക്കിളികളുടെ നേതാവ് സുരേഷ് കീഴാറ്റൂരിന്റെ ഭാര്യ ലത സുരേഷും അമ്മ ചന്ദ്രോത്ത് ജാനകിയും സമര്‍പ്പിച്ച റിട്ട് ഹര്‍ജിയിലാണ് ഹൈക്കോടതി ഉത്തരവ് . കേന്ദ്ര സംസ്ഥാന സര്‍ക്കാര്‍ ഉള്‍പ്പടെ 13 എതിര്‍ കക്ഷികളായിരുന്നു കേസിലുണ്ടായിരുന്നത് .

ഇത് വയല്‍ക്കിളികളുടെ പോരാട്ടത്തിന്റെ വിജയമാണെന്ന് വയല്‍ക്കിളികളുടെ നേതാവ് സുരേഷ് കീഴാറ്റൂര്‍ പ്രതികരിച്ചു . നിയമപരമായി തന്നെ മുന്നോട്ടു പോകുമെന്നും , നിയമപരവും രാഷ്ട്രീയപരവുമായ തീരുമാനം വിഷയത്തില്‍ ഉണ്ടാകണമെന്നും . കേരളത്തിലെ സിപിഎം ഈ കോടതി വിധിയില്‍ നിന്നും പഠിക്കാന്‍ തയ്യാര്‍ ആകണമെന്നും സുരേഷ് കീഴാറ്റൂര്‍ വ്യക്തമാക്കി .