ലേലം 2 ഉപേക്ഷിച്ചിട്ടില്ല,ഉറപ്പായും ഉണ്ടാകും;ആരാധകർക്ക് ഉറപ്പ് നൽകി നിഥിൻ രഞ്ജി പണിക്കർ

ജോബി ജോർജ്ജ് നിർമ്മിച്ച കസബ എന്ന ചിത്രത്തിലൂടെ സംവിധായകനായി അരങ്ങേറ്റം കുറിച്ച വ്യക്തിയാണ് നിതിൻ രഞ്ജി പണിക്കർ. കസബക്ക് ശേഷം മൂന്ന് വർഷം പിന്നിട്ടു അദ്ദേഹം തന്റെ രണ്ടാമത്തെ ചിത്രവും പ്രഖ്യാപിച്ചിരിക്കുകയാണ്. ആദ്യ ചിത്രം നിർമ്മിച്ച ബോബി ജോർജ് തന്നെ ഗുഡ്വിൽ എന്റർടെയ്ൻമെന്റ്സിന്റെ ബാനറിൽ നിർമിക്കുന്ന സൂപ്പർ സ്റ്റാർ സുരേഷ് ഗോപി നായകൻ ആകുന്ന കാവലാണ് അടുത്ത ചിത്രം. രണ്ടാമത്തെ ചിത്രമായി നിതിൻ പ്ലാൻ ചെയ്തിരുന്നത് അച്ഛൻ രഞ്ജി പണിക്കരുടെ തിരക്കഥയിൽ ഒരുങ്ങി സൂപ്പർഹിറ്റായി മാറിയ സുരേഷ് ഗോപിയുടെ ലേലം എന്ന ചിത്രത്തിന്റെ രണ്ടാം ഭാഗമായിരുന്നു. എന്നാൽ അതിന്റെ തിരക്കഥാരചന വൈകിയതോടെ ആണ് അദ്ദേഹം കാവൽ എന്ന ചിത്രം പ്രഖ്യാപിച്ചത്. എന്നാൽ ലേലം 2 ഉപേക്ഷിച്ചിട്ടില്ല എന്നും അത് ഉറപ്പായും നടക്കുമെന്നും അദ്ദേഹം ഇപ്പോൾ പ്രേക്ഷകർക്ക് ഉറപ്പു നൽകുകയാണ്.

ഒരുപാട് വലിയ പ്രീ പ്രൊഡക്ഷൻ ജോലികൾ ആ ചിത്രത്തിന് ഉണ്ടെന്നും, അടുത്ത വർഷം അവസാനം ഷൂട്ടിംഗ് തുടങ്ങി 2022 ഇൽ റിലീസ് ചെയ്യാൻ പാകത്തിന് ആണ് ലേലം 2 പ്ലാൻ ചെയ്യുന്നത് എന്നും നിതിൻ പറഞ്ഞു.1997 ൽ സുരേഷ് ഗോപി, സോമൻ, നന്ദിനി എന്നിവരെ വെച്ച് രഞ്ജി പണിക്കരുടെ തിരക്കഥയിൽ ജോഷി സംവിധാനം ചെയ്ത് പുറത്തെത്തിയ ലേലം വൻ വിജയമായിരുന്നു. കാവൽ എന്ന പുതിയ ചിത്രത്തിൽ സുരേഷ് ഗോപിയും ലാലും ആണ് പ്രധാന വേഷങ്ങളിലെത്തുന്നത്. സുരേഷ് ഗോപി രണ്ടു ഗെറ്റപ്പിൽ പ്രത്യക്ഷപ്പെടുന്ന ഈ ചിത്രം ഒരു മാസ്സ്‌ പടം ആയിരിക്കും. അനൂപ് സത്യൻ ഒരുക്കുന്ന ഒരു ചിത്രത്തിന്റെ തിരക്കിലാണ് ഇപ്പോൾ സുരേഷ് ഗോപി. അതിനു ശേഷമായിരിക്കും കാവലിൽ അഭിനയിക്കുക.

ഹൈറേഞ്ചിന്റെ പശ്ചാത്തലത്തിൽ ഒരുങ്ങുന്ന കാവലിൽ രണ്ട് കാലഘട്ടത്തിലെ കഥയാണ് പറയുന്നത്.ചിത്രത്തിൽ സുരേഷ് ഗോപി രണ്ട് ഗെറ്റപ്പിൽ പ്രത്യക്ഷപ്പെടും.ചിത്രത്തിൽ സയാ ഡേവിഡ്,ഐ എം വിജയൻ,അലൻസിയർ, പത്മരാജൻ രതീഷ്,സുജിത് ശങ്കർ,സന്തോഷ് കീഴാറ്റൂർ, കിച്ചു റ്റെല്ലസ്, ബിനു പപ്പു,മുത്തുമണി തുടങ്ങിയവർ അഭിനയിക്കുന്നുണ്ട്.നിഖിൽ എസ് പ്രവീൺ ആണ് ഛായാഗ്രഹണം.രഞ്ജിൻ രാജ് സംഗീതം.