റിലയന്‍സ് ജിയോയും നിരക്കുകള്‍ കുത്തനെ വര്‍ധിപ്പിച്ചു

വോഡഫോണ്‍-ഐഡിയയ്ക്കും എയര്‍ടെലിനും പിന്നാലെ റിലയന്‍സ് ജിയോയും നിരക്കുകള്‍ കുത്തനെ വര്‍ധിപ്പിക്കുന്നു. ഡിസംബര്‍ 6 ന് പ്രാബല്യത്തില്‍ വരുന്ന പുതിയ താരിഫ് പ്രകാരം റിലയൻസ് ജിയോ മൊബൈൽ സേവന നിരക്ക് 40% വരെ ഉയരും.

പരിധിയില്ലാത്ത കോളുകളും ഡാറ്റയുമുള്ള പുതിയ ‘ഓൾ ഇൻ വൺ’ പ്ലാനുകൾ ജിയോ അവതരിപ്പിക്കും. ഈ പ്ലാനുകളില്‍ മറ്റ് മൊബൈൽ നെറ്റ്‌വർക്കുകളിലേക്കുള്ള വിളികള്‍ക്ക് ന്യായമായ ഉപയോഗ നയം FUP) ഉണ്ടാകും. പുതിയ പ്ലാനുകൾക്ക് 40 ശതമാനം വരെ ഉയര്‍ന്ന നിരക്കുകളായിരിക്കും. എങ്കിലും, ആദ്യം ഉപഭോക്താവ് എന്ന വാഗ്ദാനത്തിലൂടെ ജിയോ ഉപഭോക്താക്കൾക്ക് 300 ശതമാനം വരെ കൂടുതൽ ആനുകൂല്യങ്ങൾ ലഭിക്കുമെന്നും കമ്പനി പ്രസ്താവനയില്‍ പറഞ്ഞു.

ഉപഭോക്താവിന്റെ ആത്യന്തിക താൽപ്പര്യത്തിനായി പ്രതിജ്ഞാബദ്ധരായി തുടരുമ്പോൾ, ഇന്ത്യൻ ടെലികമ്മ്യൂണിക്കേഷൻ വ്യവസായത്തെ നിലനിർത്താൻ ആവശ്യമായ എല്ലാ നടപടികളും ജിയോ സ്വീകരിക്കും. ടെലികോം താരിഫ് പരിഷ്കരിക്കുന്നതിനുള്ള കൺസൾട്ടേഷൻ പ്രക്രിയയിൽ ജിയോ സർക്കാരുമായി തുടർന്നും പ്രവർത്തിക്കും, ഒപ്പം എല്ലാ ഓഹരിയുടമകളുടെയും പങ്കാളിത്തം പ്രതീക്ഷിക്കുന്നതായും കമ്പനി പറഞ്ഞു.

ഭാരതി എയർടെൽ ഞായറാഴ്ച പുതിയ പ്ലാനുകള്‍ പ്രഖ്യാപിച്ചിരുന്നു. ഡിസംബർ 3 മുതൽ 42 ശതമാനം വരെ പ്രീ-പെയ്ഡ് ഉപഭോക്താക്കൾക്ക് കോൾ, ഡാറ്റ ചാർജുകളില്‍ വര്‍ധനവുണ്ടാകും. സമാനായി മൊബൈൽ നിരക്ക് ഉയർത്താനുള്ള തീരുമാനം വോഡഫോൺ ഐഡിയ പ്രഖ്യാപിച്ചതിന് ഏതാനും മണിക്കൂറുകൾക്ക് ശേഷമാണ് പുതിയ സംഭവവികാസങ്ങള്‍.