‘പട്ടികൾ കുരക്കട്ടെ; കാരവാൻ മുന്നോട്ട് തന്നെ പോകും’ മാമാങ്കം കളക്ഷനുമായി വേണു കുന്നപ്പിള്ളിയുടെ ഫേസ്ബുക്ക് പോസ്റ്റ്

മമ്മൂട്ടിയുടെ കരിയറിലെ ഏറ്റവും വലിയ ചിത്രമെന്ന വിശേഷണത്തോടെ പുറത്തെത്തിയ ഒന്നാണ് മാമാങ്കം. ചിത്രം ഇപ്പോൾ മികച്ച പ്രതികരണങ്ങൾ നേടി മുന്നേറുകയാണ്. മമ്മൂട്ടിയുടെ ആവേശം കൊള്ളിക്കുന്ന സംഘട്ടന രംഗങ്ങളും ത്രില്ലിംഗ് ആയ മുഹൂർത്തങ്ങളും നിറഞ്ഞ ഈ ചിത്രം വൈകാരിക മുഹൂർത്തങ്ങൾ, ഗാനങ്ങൾ, യുദ്ധ രംഗങ്ങൾ എന്നിവ കൊണ്ടും സമ്പന്നമാണ്. മമ്മൂട്ടി തന്റെ അഭിനയ മികവ് കാഴ്ചവച്ച ഈ ചിത്രം സംവിധാനം ചെയ്തത് എം പദ്മകുമാറും നിർമ്മിച്ചത് കാവ്യാ ഫിലിമ്സിന്റെ ബാനറിൽ വേണു കുന്നപ്പിള്ളിയും ആണ്.

ചിത്രം ഇപ്പോൾ 135 കോടി പിന്നിട്ടിരിക്കുന്നു എന്ന വാർത്ത കഴിഞ്ഞ ദിവസം പുറത്ത് വിട്ടിരുന്നു അണിയറ പ്രവർത്തകർ. മാമാങ്കത്തിന്റെ ഒഫീഷ്യൽ ഫേസ്ബുക്ക് പേജ് വഴിയാണ് ഈ വാർത്ത പുറത്ത് വിട്ടിരിക്കുന്നത്. ഇതോടെ മമ്മൂട്ടിയുടെ ഈ വർഷത്തെ രണ്ടാമത്തെ 100 കോടി ചിത്രമായി മാറുകയാണ് മാമാങ്കം.നേരത്തെ മധുരരാജയും 100 കോടി ക്ലബിൽ ഇടം പിടിച്ചിരുന്നു. കളക്ഷൻ റിപ്പോർട്ട് പുറത്ത് വിട്ട് നിർമാതാവ് വേണു കുന്നപ്പിള്ളി ഫേസ്ബുക്കിൽ പോസ്റ്റ് ചെയ്‌ത ക്യാപ്ഷനാണ് ഇപ്പോൾ ശ്രദ്ധ നേടുന്നത്. ‘പട്ടികൾ കുരക്കട്ടെ, കാരവാൻ മുന്നോട്ട് തന്നെ പോകും’ എന്നാണ് നിർമാതാവ് ക്യാപ്ഷൻ ഇട്ടിരിക്കുന്നത്.

www.ezhomelive.com