ഒരു മില്ല്യൺ വ്യൂസിനെക്കാളും വിലയേറിയതാണ് രാജുവേട്ടന്റെ ഈ വാക്കുകൾ;പൃഥ്വിരാജിന് നന്ദി പറഞ്ഞ് ഫോറൻസിക് സംവിധായകൻ അഖിൽ പോൾ

ശ്യാം ധർ സംവിധാനം ചെയ്ത് പ്രിഥ്വിരാജ് സുകുമാരൻ പ്രധാനവേഷത്തിലെത്തിയ സെവൻത് ഡേ എന്ന ചിത്രത്തിന്റെ രചന നിർവഹിച്ചു കൊണ്ട് മലയാള സിനിമ ഇൻഡസ്ട്രിയിലേക്ക് കടന്നുവന്ന വ്യക്തിയാണ് അഖിൽ പോൾ. അദ്ദേഹവും അനസ് ഖാനും ഒന്നിച്ച് സംവിധാനം ചെയ്യുന്ന ചിത്രമായ ഫോറൻസിക്കിന്റെ ട്രെയിലർ കഴിഞ്ഞ ദിവസം റിലീസ് ചെയ്യുകയുണ്ടായി. ഏറെ പ്രേക്ഷകശ്രദ്ധ ആണ് ട്രെയിലർ നേടിയെടുത്തത്. ചിത്രം അടുത്ത മാസം റിലീസ് ചെയ്യും. ചിത്രത്തിന്റെ ട്രെയിലർ കണ്ടതിനുശേഷം പൃഥ്വിരാജ് സുകുമാരൻ പറഞ്ഞ വാക്കുകൾ തന്റെ ഫേസ്ബുക്ക് പേജിലൂടെ ഷെയർ ചെയ്തിരിക്കുകയാണ് അഖിൽ പോൾ. ഒരു മില്യണ് വ്യൂസ് തന്റെ ചിത്രത്തിന്റെ ട്രയ്ലർ നേടിയാലും ലഭിക്കാത്ത സന്തോഷവും വിലയുമാണ് പൃഥ്വിരാജിന്റെ ഈ വാക്കുകൾ തന്നത് എന്നാണ് അഖിൽ പോൾ പറയുന്നത്.

ട്രയ്ലർ കണ്ട പൃഥ്വിരാജ് അഖിലിന് വാട്സ്ആപ് സന്ദേശമയച്ചത് ചിത്രം വളരെ നന്നായി ഒരുക്കിയിട്ടുണ്ട് എന്നും അഖിലിനെ ഓർത്തു അഭിമാനിക്കുന്നു എന്നും ആയിരുന്നു. സാമുവൽ ജോൺ എന്ന ഫോറൻസിക് ഉദ്യോഗസ്ഥനായി ടോവിനോ തോമസ് നായകവേഷം ചെയ്യുന്ന ഈ ചിത്രത്തിൽ നായികയായി എത്തുന്നത് മംത മോഹൻദാസ് ആണ്. രഞ്ജി പണിക്കർ, സൈജു കുറുപ്പ്, റീബ മോണിക്ക ജോണ്, ധനേഷ് ആനന്ദ് എന്നിവരും ചിത്രത്തിൽ പ്രധാനവേഷങ്ങൾ അവതരിപ്പിക്കുന്നുണ്ട്. അഖിൽ ജോർജ് ക്യാമറയും ജേക്സ് ബിജോയി സംഗീതവും ഒരുക്കുന്ന ഈ ചിത്രം നിർമ്മിക്കുന്നത് ജൂവിസ് പ്രൊഡക്ഷൻസിന്റെ ബാനറിൽ നാവിസ് സേവ്യർ, സിജു മാത്യു എന്നിവർ ചേർന്ന് ആണ്.

www.ezhomelive.com