കൊവിഡ് കെയര്‍ സെന്ററുകളില്‍ സന്ദര്‍ശകര്‍ക്ക് വിലക്കേര്‍പ്പെടുത്തി കണ്ണൂര്‍ കലക്ടര്‍
കണ്ണൂർ: കൊവിഡ് വ്യാപനഭീതിയുടെ പശ്ചാത്തലത്തില്‍ വിദേശത്തു നിന്നെത്തുന്നവര്‍ നിരീക്ഷണത്തില്‍ കഴിയുന്ന കൊവിഡ് കെയര്‍ സെന്ററുകളില്‍ അനധികൃത സന്ദര്‍ശകരെത്തുന്നത് കര്‍ശനമായി തടയാന്‍ ജില്ലാ കലക്ടര്‍ ടി വി സുഭാഷ് ബന്ധപ്പെട്ടവര്‍ക്ക് നിര്‍ദ്ദേശം നല്‍കി. വീടുകളില്‍ ക്വാറന്റീനില്‍ കഴിഞ്ഞാലുള്ള സാമൂഹ്യ വ്യാപന സാധ്യത തടയുകയെന്ന ലക്ഷ്യത്തോടെയാണ് കൊറോണവ്യാപനം ശക്തമായ വിദേശ നാടുകളില്‍ നിന്നെത്തുന്നവരെ കെയര്‍ സെന്ററുകളില്‍ നിരീക്ഷണത്തിലാക്കാന്‍ സര്‍ക്കാര്‍ തീരുമാനിച്ചത്. എന്നാല്‍ ബന്ധുക്കളും സുഹൃത്തുകളും മറ്റും ഇവിടങ്ങളില്‍ സന്ദര്‍ശകരായെത്തുന്നത് ഇതിന്റെ ലക്ഷ്യം തന്നെ പരാജയപ്പെടാന്‍ ഇടവരുത്തും.
കൊറോണ കെയര്‍ സെന്ററുകളില്‍ മാത്രമല്ല, ഇതര സംസ്ഥാനങ്ങളില്‍ നിന്നും മറ്റുമെത്തിയവര്‍ നിരീക്ഷണത്തില്‍ കഴിയുന്ന വീടുകളിലും സന്ദര്‍ശകരെ അനുവദിക്കരുതെന്നും ഇക്കാര്യത്തില്‍ തികഞ്ഞ ജാഗ്രത എല്ലാവരുടെയും ഭാഗത്തുനിന്നുണ്ടാവണമെന്നും ജില്ലാ കലക്ടര്‍ പറഞ്ഞു. ഈയൊരു ലക്ഷ്യത്തോടെയാണ് ഇത്തരം വീടുകളില്‍ പ്രത്യേക പോസ്റ്റര്‍ പതിക്കാനും ലോക്ക് ദി ഹോം പദ്ധതി നടപ്പിലാക്കാനും തീരുമാനിച്ചതെന്നും അദ്ദേഹം പറഞ്ഞു.
വീടുകളില്‍ നിരീക്ഷണത്തില്‍ കഴിയുന്നവര്‍ നിയന്ത്രണങ്ങള്‍ പാലിക്കുന്നുണ്ടെന്ന് ഉറപ്പുവരുത്തുന്നതിന് നിയോഗിക്കപ്പെട്ട ഉദ്യോഗസ്ഥര്‍ പ്രത്യേകം ശ്രദ്ധിക്കണം. അതിര്‍ത്തികള്‍ വഴിയും വിമാനത്താവളങ്ങളിലൂടെയും ജില്ലയിലെത്തുന്നവരുടെ കൃത്യമായ വിവരങ്ങള്‍ അതതു സമയങ്ങളില്‍ തന്നെ ബന്ധപ്പെട്ടവര്‍ക്ക് കൈമാറണമെന്നും കലക്ടര്‍ നിര്‍ദ്ദേശം നല്‍കി. കലക്ടറേറ്റില്‍ ചേര്‍ന്ന കൊറോണ അവലോകന യോഗത്തില്‍ തുറമുഖ വകുപ്പ് മന്ത്രി രാമചന്ദ്രന്‍ കടന്നപ്പള്ളി, മേയര്‍ സുമ ബാലകൃഷ്ണന്‍, ജില്ലാ പഞ്ചായത്ത് പ്രസിഡന്റ് കെ വി സുമേഷ്, എസ്പി യതീഷ് ചന്ദ്ര, സബ് കലക്ടര്‍മാരായ ആസിഫ് കെ യൂസഫ്, എസ് ഇലാക്യ, അഡീഷനല്‍ എസ്പി പ്രജീഷ് തോട്ടത്തില്‍, എഡിഎം ഇ പി മേഴ്സി തുടങ്ങിയവര്‍ സംബന്ധിച്ചു.
About Ammus
No comments
Post a Comment