എ.ടി.എമ്മില്‍നിന്ന് കീറിയ നോട്ട് ലഭിച്ചാല്‍ എന്തുചെയ്യും?
ന്യൂഡല്‍ഹി:
ഡിജിറ്റലായി പണമിടപാടുകള്‍ നടത്താമെങ്കിലും ആവശ്യത്തിനായി ഒരു തുക കൈയില്‍ വെക്കുന്നവരാണ് എല്ലാവരും. പണം ലഭിക്കാന്‍ ആശ്രയിക്കുന്നതാകട്ടെ തൊട്ടടുത്ത എ.ടി.എമ്മിനെയും.
ബാങ്കില്‍ ക്യൂ നിന്നോ ചെക്ക് എഴുതി നല്‍കിയോ പണം സ്വീകരിക്കാതെ എ.ടി.എം കാര്‍ഡ് വഴി എളുപ്പത്തില്‍ ഇപ്പോള്‍ പണം ലഭിക്കും. എന്നാല്‍, ഈ നോട്ടുകള്‍ കീറിയതാണെങ്കില്‍ എന്തുചെയ്യും. ഒരു ഭാഗം നഷ്ടമായതോ അല്ലെങ്കില്‍ കഷ്ണങ്ങളായി മാറിയ നോട്ടുകളോ ആണ് വികലമാക്കിയ നോട്ടുകളായി കണക്കാക്കുക. ഇൗ നോട്ടുകള്‍ ഉപയോഗിച്ച്‌ യാതൊരു ഇമിടപാടുകള്‍ നടത്താനും കഴിയില്ല. ഇത്തരത്തില്‍ കീറിയ നോട്ടുകള്‍ ലഭിച്ചാല്‍ നിങ്ങളുടെ പണം നഷ്ടമാകുമെന്ന ആശങ്ക വേണ്ട. റിസര്‍വ് ബാങ്ക് ഓഫ് ഇന്ത്യയുടെ ഈ നിര്‍ദേശങ്ങള്‍ പാലിച്ചാല്‍ മതി.
വികലമായ നോട്ട് കിട്ടിയാല്‍ എന്തുചെയ്യണം?
കീറിയ നോട്ടുകള്‍ ലഭിച്ചാല്‍ ഏത് ബാങ്കിന്‍റെ എ.ടി.എമ്മില്‍നിന്നാണോ പണം പിന്‍വലിച്ചത് ഉടന്‍ ആ ബാങ്കിലെത്തണം. എ.ടി.എമ്മില്‍നിന്ന് പണം ലഭിച്ചപ്പോള്‍ കിട്ടിയ സ്ലിപ്പിനൊപ്പം കീറിയ നോട്ടുകളും പണം പിന്‍വലിച്ച സമയം, തീയതി, എ.ടി.എം സ്ഥിതി ചെയ്യുന്ന സ്ഥലം എന്നിവ എഴുതിചേര്‍ത്ത അപേക്ഷയും നല്‍കണം. പണം പിന്‍വലിച്ചതിന്‍റെ സ്ലിപ്പ് ഇല്ലെങ്കില്‍ മൊബൈല്‍ ഫോണില്‍ പണം പിന്‍വലിച്ചത് സംബന്ധിച്ചുവന്ന മെസേജ് രേഖയായി നല്‍കിയാലും മതിയാകും. പിന്നീട് ബാങ്ക് അപേക്ഷ പരിശോധിച്ച ശേഷം കീറിയ നോട്ടുകള്‍ക്ക് പകരം പുതിയ നോട്ടുകള്‍ നല്‍കും.
'തങ്ങള്‍ എ.ടി.എമ്മുകളില്‍ പണം നിറയ്ക്കുന്നതിന് മുമ്ബ് അത്യാധുനിക മെഷീന്‍ ഉപയോഗിച്ച്‌ പരിശോധിക്കും. അതിനാല്‍ തന്നെ വികലമാക്കിയ നോട്ടുകള്‍ ലഭിക്കാന്‍ സാധ്യതയില്ല. എങ്കിലും ഇത്തരം നോട്ടുകള്‍ ലഭിക്കുകയാണെങ്കില്‍ തൊട്ടടുത്ത ബ്രാഞ്ച് സന്ദര്‍ശിച്ചാല്‍ മതിയാകും' -ഒരു ഉപഭോക്താവ് ട്വിറ്ററില്‍ പങ്കുവെച്ച പരാതിക്ക് മറുപടിയായി സ്റ്റേറ്റ് ബാങ്ക് ഓഫ് ഇന്ത്യ കുറിച്ചു.
എസ്.ബി.ഐയുടെ https://crcf.sbi.co.in/ccf/ എന്ന ലിങ്ക് വഴി നോട്ടുകളുമായി ബന്ധപ്പെട്ട പരാതികള്‍ ഉന്നയിക്കാം. എസ്.ബി.ഐയുടെ എ.ടി.എം സേവനങ്ങള്‍ക്കായിരിക്കും ഈ ഓണ്‍ലൈന്‍ സേവനം ലഭ്യമാകുക.
പിഴ ഈടാക്കാം
വികലമാക്കപ്പെട്ട നോട്ടുകള്‍ മാറി നല്‍കുന്നതിനുള്ള റിസര്‍വ് ബാങ്കിന്‍റെ നിര്‍ദേശങ്ങള്‍ ബാങ്ക് ജീവനക്കാര്‍ ലംഘിച്ചാല്‍ ഉപഭോക്താക്കള്‍ പരാതി നല്‍കാന്‍ സാധിക്കും. ബാങ്കിനെതിരെ 10,000 രൂപ പിഴ ഈടാക്കാനും കഴിയും.
About Ammus
No comments
Post a Comment