പാനൂർ ബസ്സ്സ്റ്റാൻഡിൽ നിൽക്കണേൽ മൂക്കുപൊത്തണം

പാനൂർ ബസ്സ്റ്റാൻഡിൽ മാലിന്യം കുന്നുകൂടി യാത്രക്കാർ മൂക്കുപ്പൊത്തി സഞ്ചരിക്കുന്നത് നിത്യ കാഴ്ചയായി. മാസങ്ങളായി അടഞ്ഞുകിടക്കുന്ന ശൗചാലയത്തിന് സമീപമാണ് മാലിന്യ കൂമ്പാരം. ദുർഗന്ധം മൂലം സമീപത്തുള്ള കച്ചവട സ്ഥാപനങ്ങളിൽ ആളുകൾ വരാതെയായി. നിരവധി തവണ നഗരസഭാ
അധികാരികളുടെ ശ്രദ്ധയിൽപ്പെടുത്തിയിട്ടും നടപടിയില്ലെന്ന് വ്യാപാരികളും ഓട്ടോ ഡ്രൈവർമാരും പറയുന്നു. നഗരസഭ നിലവിൽ വന്നിട്ട് എട്ടു വർഷമായിട്ടും മാലിന്യ സാംസ്കരണത്തിനുള്ള ഒരു നടപടിയുമില്ല. ഓരോ ബജ്റ്റിലും മാലിന്യ സംസ്കരണ പ്ലാന്റിന് തുക മാറ്റി വയ്ക്കാറുണ്ടെങ്കിലും പദ്ധതി നടപ്പാക്കാതെ കടലാസിൽ ഒതുക്കുകയാണ്. പൂക്കോം , പെരിങ്ങത്തൂർ ടൗണുകളിലെ ഹോട്ടലുകളിലെയും, മറ്റു സ്ഥാപനങ്ങളിലെയും വ്യാപാരികൾ ജൈവമാലിന്യം എന്തു ചെയ്യണമെന്നറിയാതെ ദുരിതമനുഭവിക്കുകയാണ്. വീട്ടിൽ കൊണ്ടുപോയി സംസ്കരിക്കുകയാണ് പലരും. മാലിന്യ സംസ്കരണത്തിന് ശാശ്വത പരിഹാരം കാണണമെന്നും ഇല്ലെങ്കിൽ സമരങ്ങൾക്ക് ഡി വൈ എഫ് ഐ നേതൃത്വം നൽകുമെന്നും പാനൂർ ബ്ലോക്ക് കമ്മിറ്റി മുന്നറിയിപ്പ് നൽകി.