പൊതുജനത്തെ വലച്ച് സംസ്ഥാനത്ത് ഇന്ന് കടയടപ്പ് സമരം
തിരുവനന്തപുരം: സംസ്ഥാനവ്യാപകമായി എല്ലാ കടകളും ഇന്ന് കടയടപ്പ് സമരം നടത്തുകയാണ്. വ്യാപാരികൾ നേരിടുന്ന പ്രശ്നങ്ങൾ പരിഹരിക്കണം എന്നാവശ്യപ്പെട്ടു കേരള വ്യാപാരി വ്യവസായി ഏകോപന സമിതി നടത്തുന്ന വ്യാപാര സംരക്ഷണ യാത്രയുടെ സമാപനത്തോട് അനുബന്ധിച്ചാണ് ഇന്ന് കടയടപ്പു സമരം നടത്തുന്നത്. രാവിലെ മുതൽ രാത്രി 8 വരെയാണ് സമരം. സംസ്ഥാനത്തെ മിക്ക കടകളും അടഞ്ഞ് കിടക്കുകയാണ്. വാഹനങ്ങൾ ഓടുന്നത് ഒഴിച്ചാൽ സംസ്ഥാനത്ത് പൊതുവിൽ ഹർത്താൽ പ്രതീയാണുള്ളത്.
കേരള വ്യാപാരി വ്യവസായി ഏകോപന സമിതി സംസ്ഥാന പ്രസിഡന്റ് രാജു അപ്സര നയിക്കുന്ന യാത്ര ഇന്ന് തിരുവനന്തപുരത്ത് സമാപിക്കും. കാസർഗോഡ് നിന്നാണ് യാത്ര ആരംഭിച്ചത്. യാത്രയുടെ സമാപനത്തിൽ അഞ്ച് ലക്ഷം വ്യാപാരികള് ഒപ്പിട്ട നിവേദനം മുഖ്യമന്ത്രിക്ക് കൈമാറും.
ഇതോട് അനുബന്ധിച്ചാണ് ഇന്നു സംസ്ഥാന വ്യാപകമായി കടയടപ്പ് സമരം നടത്തുന്നത്.
ഹോട്ടലുകൾ, പലചരക്ക് കടകൾ ഉൾപ്പെടെയുള്ള വ്യാപാര സ്ഥാപനങ്ങൾ അടച്ചിടുന്നതോടെ സമരം ജനത്തെ സാരമായി ബാധിക്കും. നിരവധി തൊഴിലാളികൾക്ക് ഒരു ദിവസത്തെ തൊഴിലും നഷ്ടമാകും. വര്ധിപ്പിച്ച ട്രേഡ് ലൈസന്സ് കുറയ്ക്കുക, വർധിപ്പിച്ച ലീഗല് മെട്രോളജി ഫീസ് പിന്വലിക്കുക, അശാസ്ത്രീയമായ പ്ലാസ്റ്റിക് നിരോധനത്തിന്റെ പേരില് വ്യാപാരികളെ വേട്ടയാടുന്നത് അവസാനിപ്പിക്കുക തുടങ്ങിയ ആവശ്യങ്ങള് ഉന്നയിച്ചാണ് വ്യാപാരികൾ സമരം നടത്തുന്നത്.
No comments
Post a Comment