പോളിംഗ് ബൂത്തിൽ ആരതി പൂജ : വനിതാ കമ്മീഷൻ ചെയർപേഴ്സനെതിരെ കേസ്

മുംബൈ: പോളിംഗ് ബൂത്തിൽ ആരതി പൂജ. മഹാരാഷ്ട്ര വനിതാ കമ്മീഷൻ ചെയർപേഴ്‌സണും എൻസിപി നേതാവുമായ രൂപാലി ചക്കർ ആരതി നടത്തുന്നതിൻ്റെ ചിത്രം സമൂഹമാധ്യമങ്ങളിൽ വൈറലാകുന്നു. ഇതിനു പിന്നാലെ രൂപാലിയ്ക്കെതിരെ കേസെടുത്തു.

ഖഡക്വാസല പ്രദേശത്തെ ഒരു പോളിംഗ് സ്റ്റേഷനിലാണ് രൂപാലി എത്തിയത്. വോട്ടെടുപ്പ് ആരംഭിക്കുന്നതിന് മുമ്പ് ആരതിയും വിളക്കുമായി അവർ പോളിംഗ് സ്റ്റേഷനിലേക്ക് പ്രവേശിച്ചു. തുടർന്ന് പോളിങ് സ്റ്റേഷനിലെ ഐവിഎം മെഷീനിൽ പൂജ നടത്തുകയായിരുന്നു. ഈ ചിത്രം പുറത്തു വന്നതിനു പിന്നാലെ രൂപാലിക്കെതിരെ നടപടി സ്വീകരിക്കാൻ തിരഞ്ഞെടുപ്പ് കമ്മീഷനോട് നിരവധിയാളുകൾ സോഷ്യൽ മീഡിയ പ്ലാറ്റ്ഫോമായ എക്‌സിലൂടെ ആവശ്യമുന്നയിച്ചിരുന്നു. സിംഹഗഡ് റോഡിൽ പൊലീസാണ് യുവതിക്കെതിരെ കേസെടുത്തിരിക്കുന്നത്.